رمضان جانا :)

كل سنة والعالم الاسلامي جميعا بخير، والله يديم جميع اخوتنا من الاديان السماوية الاخرى بخير ويجعلنا اخوة وسند لبعض

كل سنة لما بيجي رمضان بنتوتر من النهار الطويل والعجقة والصيام والعطش والشوب، بس بعد ما يمضى اول يومين بيمشي حالنا، وبتبلش حلاوة رمضان تظهر اكتر واكتر.. يعني الحمد لله انو كل سنة في إلها نوع حلاوة معين، يا اما بنكون بين اهلنا، او بيكون معنا زوج وشريك حياة، او حتى يكون معنا طفل جديد يملى علينا حياتنا..

هالسنة تحديدا عشت نوع كتير حلو من الحلاوة والسعادة، حلاوة سحور رمضان، لما كل العيلة بتجتمع على طاولة وحدة وبتبدا الاحاديث والنقاشات واللي بدو ياكل واللي بدو يشرب وياللي نعسان ما عم يقدر لا ياكل ولا يشرب ولا يرجع ينام بانتظار الصلاة.. رمضان عن جد بيجمع العيلة، اول شي عالسحور وتاني شي عالفطور، وممكن كمان على صلاة التراويح، وبآخر رمضان بنجتمع على صلاة العيد وبنختم رمضان بعيد الفطر، 3 ايام متتالية من الجمعات العائلية وصلة الرحم

ايه، الحمد لله على نعمة رمضان، والله يديمها من نعمة، ويجمع قلوب العالم على بعض ويزيد المحبة والسلام بين القلوب والعقول والارواح

كل رمضان وانتو بخير